चंद्रपूर: आगामी सार्वजनिक गणेशोत्सव-२०२६ च्या पार्श्वभूमीवर चंद्रपूर जिल्ह्यात कायदा, सुव्यवस्था आणि शांतता राखण्यासाठी प्रशासनाने कंबर कसली आहे. सर्वोच्च न्यायालय आणि शासनाच्या ध्वनी प्रदूषण नियमांचे काटेकोर पालन करण्यासाठी यंदा श्री गणेश चतुर्थीपासून जिल्ह्यात ‘डीजे’ (DJ) वाजवण्यावर पूर्णपणे बंदी घालण्यात आली आहे. या बंदीची अतिशय प्रभावीपणे अंमलबजावणी करण्यात येईल, असे प्रशासनातर्फे स्पष्ट करण्यात आले असून सर्व डीजे चालक-मालक व गणेश मंडळांनी याला सहकार्य करावे, असे आवाहन चंद्रपूर जिल्हा पोलिसांतर्फे करण्यात आले आहे.
पोलीस मुख्यालयात पूर्वतयारी आढावा बैठक संपन्न गणेशोत्सवाच्या पूर्वतयारीचा आढावा घेण्यासाठी काल संध्याकाळी पोलीस मुख्यालय, चंद्रपूर येथील ड्रिल शेडमध्ये एक महत्त्वपूर्ण नियोजन बैठक पार पडली. ही बैठक चंद्रपूरचे पोलीस अधीक्षक मा. श्री. आयुष नोपानी यांच्या अध्यक्षतेखाली संपन्न झाली. या बैठकीला चंद्रपूर महानगरपालिकेचे आयुक्त मा. श्री. अकनूरी नरेश, अप्पर पोलीस अधीक्षक मा. श्री. ईश्वर कातकडे, उपविभागीय पोलीस अधिकारी मा. श्री. प्रमोद चौगुले यांच्यासह विविध शासकीय विभागांचे अधिकारी, पोलीस कर्मचारी, जिल्ह्यातील विविध गणेश मंडळांचे प्रतिनिधी, मूर्तिकार आणि डीजे चालक-मालक मिळून सुमारे २०० ते २५० नागरिक उपस्थित होते.
प्रशासनातर्फे गणेश मंडळांना महत्त्वाच्या सूचना: गणेशोत्सव शांततापूर्ण, सुरक्षित आणि शिस्तबद्ध वातावरणात साजरा करण्यासाठी बैठकीत खालील महत्त्वपूर्ण निर्णय व सूचना देण्यात आल्या:
- समन्वय व सुरक्षा व्यवस्था: सर्व गणेश मंडळांनी आपापल्या पातळीवर समन्वय समिती स्थापन करावी. सुरक्षेचा उपाय म्हणून स्वयंसेवकांची नियुक्ती करावी आणि मंडप परिसरात सीसीटीव्ही (CCTV) कॅमेरे बंधनकारक करावेत.
- बालकांची सुरक्षा: विसर्जन मिरवणुकीदरम्यान वाहनांवर लहान मुलांना बसवू नये, जेणेकरून संभाव्य अपघात टाळता येतील.
- पारंपरिक वाद्यांना प्राधान्य: संस्कृतीचे जतन करण्यासाठी यंदाच्या महोत्सवात डीजे ऐवजी पारंपरिक वाद्यांचा (ढोल-ताशा इ.) वापर वाढवण्याबाबत विशेष मार्गदर्शन करण्यात आले.
- आदर्श गणेश मंडळ स्पर्धा: जिल्ह्यातील सर्व मंडळांनी प्रशासनातर्फे आयोजित केल्या जाणाऱ्या ‘आदर्श गणेश मंडळ स्पर्धेत’ उत्स्फूर्तपणे सहभागी व्हावे.
जिल्हा प्रशासन व चंद्रपूर जिल्हा पोलीस दलाच्या वतीने गणेशोत्सवासाठी सर्व आवश्यक तयारी पूर्ण करण्यात येत आहे. नागरिकांनी आणि गणेश मंडळांनी प्रशासनाने दिलेल्या सर्व नियमांचे व सूचनांचे तंतोतंत पालन करून आगामी उत्सव शांततेत व उत्साहात साजरा करावा, असे आवाहन चंद्रपूर पोलिसांनी केले आहे.
