मुंबई: महाराष्ट्रात लोकसभा निवडणुकांमध्ये महायुतीला मोठा फटका बसल्यानंतर भाजपाने शिंदे गट आणि अजित पवार गटाशी केलेल्या युतीचा फायदा झाला की तोटा? या चर्चेला ऊत आला आहे. दरम्यान, आगामी विधानसभा निवडणुकांच्या पार्श्वभूमीवर मराठा आरक्षणाचा मुद्दा पुन्हा चर्चेत आला असून, मनोज जरांगे पाटलांनी आपल्या आक्रमक भूमिका सुरू केल्या आहेत. यामुळे भाजपाची अडचण वाढण्याची शक्यता वर्तवली जात आहे. याच मुद्द्यावर उपमुख्यमंत्री देवेंद्र फडणवीस यांनी गुरुवारी इंडिया टुडेच्या कॉनक्लेव्हमध्ये आपली भूमिका स्पष्ट केली.

फडणवीसांचा मनोज जरांगे पाटलांवर निशाणा

फडणवीस म्हणाले, “मराठा समाजाला आम्ही १० टक्के आरक्षण दिलं आहे, परंतु मनोज जरांगे पाटील यांची मागणी ओबीसी प्रवर्गातून आरक्षण मिळावी अशी आहे. आम्ही सर्वपक्षीय बैठक घेऊन त्यावर एकमताने निर्णय घेतला आहे, ज्यात शरद पवार, नाना पटोले, उद्धव ठाकरे यांच्या पक्षाचाही सहभाग होता.”

“…त्या दिवशी मी राजीनामा देईन” – फडणवीसांचा निर्णायक इशारा

मनोज जरांगे पाटील यांच्या आरोपांवर प्रतिक्रिया देताना फडणवीस म्हणाले, “जर माझे मुख्यमंत्री सांगतील की मराठा आरक्षणाचा निर्णय मी अडकवला आहे, त्या दिवशी मी राजीनामा देईन आणि राजकारणातून संन्यासही घेईन.” या विधानामुळे राजकीय वर्तुळात खळबळ माजली आहे.

फडणवीसांचं जरांगे पाटलांना आव्हान

फडणवीसांनी मनोज जरांगे पाटलांना आव्हान देत म्हटलं, “तुम्ही ज्यांना पाठिंबा देता, त्यांनी लिहून द्यावं की सत्तेत आल्यास मराठा समाजाला ओबीसी प्रवर्गातून आरक्षण दिलं जाईल, मग तुम्ही त्यांना मदत करा.”

राजकीय डावपेचांचा आरोप

फडणवीस म्हणाले, “हे सगळं राजकीय चालू आहे. अनेक लोक इतरांच्या खांद्यांवरून बंदुका चालवत आहेत. निवडणुकीत त्याचा अपेक्षेप्रमाणे परिणाम होणार नाही,” असं फडणवीसांनी स्पष्ट केलं. फडणवीस यांच्या या विधानामुळे आगामी निवडणुकांवर परिणाम होण्याची शक्यता वर्तवली जात असून, मराठा आरक्षणाच्या मुद्द्यावर राजकीय वर्तुळात चर्चेला उधाण आलं आहे.