महाराष्ट्र विधानसभा निवडणुकीसाठी भाजपाच्या उमेदवारांची तिसरी यादी जाहीर; महायुतीत घडामोडींना वेग
महाराष्ट्र विधानसभा निवडणुकीच्या पार्श्वभूमीवर भारतीय जनता पक्षानं आपली तिसरी उमेदवारांची यादी जाहीर केली आहे. ९९ उमेदवारांची पहिली आणि २२ उमेदवारांची दुसरी यादी प्रसिद्ध केल्यानंतर, तिसऱ्या यादीत २५ नव्या उमेदवारांची नावे समाविष्ट आहेत. आतापर्यंत भाजपानं महायुतीमध्ये एकूण १४६ उमेदवारांची घोषणा केली आहे. यामुळे भाजपाच्या यादीत मोठ्या हालचाली घडल्या असून, महायुतीतील जागावाटपावर पुन्हा चर्चा होण्याची शक्यता आहे.
मोर्शीतून उमेश यावलकर विरुद्ध राष्ट्रवादीचे देवेंद्र भुयार
मोर्शी विधानसभा मतदारसंघावर यंदाच्या निवडणुकीत विशेष लक्ष केंद्रित आहे. राष्ट्रवादी काँग्रेसच्या (अजित पवार गट) वतीनं देवेंद्र भुयार यांना उमेदवारी जाहीर केल्यानंतर भाजपनं आपली रणनीती स्पष्ट करत उमेश यावलकर यांना मोर्शीतून उमेदवारी दिली आहे. त्यामुळे या मतदारसंघात लढत अधिक तीव्र होण्याची शक्यता वर्तवली जात आहे.
तीन विद्यमान आमदारांचं तिकीट कापलं!
यादीतून तीन विद्यमान आमदारांना तिकीट नाकारण्यात आलं आहे. आर्णी मतदारसंघातून संदीप दुर्वै यांच्याऐवजी राजू तोडसाम, नागपूर मध्यमधून विकास कुंभारे यांच्याऐवजी प्रवीण दटके, आणि आर्वी मतदारसंघातून दादाराव केचे यांच्याऐवजी सुमीर वानखेडे यांना उमेदवारी जाहीर करण्यात आली आहे. हे बदल पक्षातील अंतर्गत समीकरणे आणि मतदारसंघातील प्रभावी नेतृत्वाच्या गरजांवर आधारित असल्याचं बोललं जात आहे.
वरिष्ठ नेत्यांनाही धक्का: प्रकाश मेहता, गोपाळ शेट्टींचं तिकीट कट
घाटकोपर पूर्वमधून प्रकाश मेहता आणि बोरीवलीमधून गोपाळ शेट्टी यांना उमेदवारी नाकारण्यात आली. घाटकोपर पूर्वमध्ये भाजपनं पराग शाह यांनाच पुन्हा उमेदवारी दिली आहे, तर बोरीवलीत संजय उपाध्याय यांना संधी देण्यात आली आहे. गोपाळ शेट्टी आणि प्रकाश मेहता हे दोन्ही भाजपचे वरिष्ठ नेते असले तरी त्यांना यावेळी बाजूला ठेवण्यात आल्याने कार्यकर्त्यांमध्ये चर्चा रंगली आहे.
काँग्रेसमधून आलेल्या अर्चना पाटील यांना लातूरची संधी
काँग्रेसमधून भाजपात दाखल झालेल्या अर्चना पाटील चाकूरकर यांना लातूरमधून उमेदवारी देण्यात आली आहे. भाजपाच्या तिसऱ्या यादीत ही उमेदवारी दिल्यानं, लातूरमधील राजकीय समीकरणं बदलण्याची शक्यता निर्माण झाली आहे.
महायुतीत जागावाटपावर नवी चर्चा
भाजपाच्या तिसऱ्या यादीच्या घोषणेनंतर महायुतीमधील इतर घटक पक्षांनीही जागावाटपावर चर्चा सुरू केली आहे. या यादीने भाजपच्या आगामी रणनीतीला स्पष्टता आणली असून, त्यात विद्यमान आमदारांना तिकीट नाकारण्याचा निर्णय मोठा आहे.
