भाजपात उठलेले वादळ शांत पक्षप्रवेशानंतर जोरगेवारांना उमेदवारी जाहीर होण्याची शक्यता
चंद्रपूर, २७ ऑक्टोबर: चंद्रपूर विधानसभा मतदारसंघाचे अपक्ष आमदार किशोर जोरगेवार आणि महिला काँग्रेसच्या माजी जिल्हाध्यक्षा नम्रता आचार्य-ठेमस्कर यांनी आज भारतीय जनता पक्षात (भाजप) प्रवेश केला. पालकमंत्री सुधीर मुनगंटीवार यांच्या हस्ते झालेल्या या पक्ष प्रवेश सोहळ्याला राष्ट्रीय मागासवर्ग आयोगाचे अध्यक्ष व माजी केंद्रीयमंत्री हंसराज अहिर, भाजपाचे ग्रामीण जिल्हाध्यक्ष हरीश शर्मा, चंद्रपूर शहर जिल्हाध्यक्ष राहुल पावडे, देवराव भोंगळे आदी मान्यवर उपस्थित होते.
आमदार जोरगेवार यांच्या भाजप प्रवेशावरून पक्षात मोठे वादळ उठले होते. मात्र, हा तणाव आता शांत झाला आहे. जोरगेवारांच्या प्रवेशानंतर काही तासांतच त्यांना उमेदवारी जाहीर केली जाईल, असे पालकमंत्री सुधीर मुनगंटीवार यांनी पत्रकार परिषदेत स्पष्ट केले.
नम्रता आचार्य-ठेमस्कर यांचा काँग्रेसला धक्का, भाजपात स्वागत
महिला काँग्रेसच्या माजी जिल्हाध्यक्षा नम्रता आचार्य-ठेमस्कर यांनी काँग्रेसमधील अंतर्गत मतभेद आणि जातीयवादी धोरणांविरुद्ध तीव्र भूमिका घेत पक्षाचा आणि पदाचा राजीनामा दिला होता. त्यांच्या राजीनाम्यामुळे काँग्रेसला मोठा धक्का बसला आहे, कारण आचार्य-ठेमस्कर यांचा स्थानिक स्तरावर महिला आणि मागासवर्गीय मतदारांवर चांगला प्रभाव होता.
भाजपाने त्यांचा निर्णय स्वागतार्ह ठरवत त्यांना पक्षात महत्त्वाची भूमिका दिली आहे. त्यांच्या प्रवेशामुळे भाजपाला चंद्रपूर जिल्ह्यात मोठा फायदा होणार आहे. विशेषत: महिला आणि मागासवर्गीय मतदारांचे समर्थन मिळवण्यासाठी आचार्य-ठेमस्कर यांचे नेतृत्व भाजपाच्या आगामी निवडणुकीत निर्णायक ठरू शकते. काँग्रेसला मिळणारा हा धक्का भाजपासाठी मोठी संधी ठरली आहे, आणि यामुळे स्थानिक राजकारणात भाजपाचे प्रभाव अधिक वाढण्याची शक्यता आहे.
राजकीय खेळी आणि स्थानिक राजकारणावर परिणाम
किशोर जोरगेवार यांच्या भाजप प्रवेशामुळे चंद्रपूर जिल्ह्यातील राजकीय समीकरणे मोठ्या प्रमाणात बदलण्याची शक्यता आहे. जोरगेवार हे चंद्रपूरमध्ये अपक्ष म्हणून मोठ्या राजकीय प्रभावाखाली होते, आणि त्यांच्या भाजप प्रवेशामुळे येथील निवडणूक संघर्ष आता अधिक तीव्र होईल.
नम्रता आचार्य-ठेमस्कर यांची महत्त्वाची भूमिका
चंद्रपूर जिल्ह्यात आगामी विधानसभा निवडणुकीत नम्रता आचार्य-ठेमस्कर यांची भूमिका अत्यंत महत्त्वाची ठरणार आहे. काँग्रेसमध्ये त्यांचा महिला आणि मागासवर्गीय मतदारांवर चांगला प्रभाव होता, जो आता भाजपसाठी फायद्याचा ठरू शकतो. नम्रता आचार्य-ठेमस्कर यांच्या नेतृत्वाखालील महिला मतदारांचा प्रभाव भाजपच्या निवडणूक प्रचारात निर्णायक ठरू शकतो. विशेषत: महिला आणि मागासवर्गीयांचे समर्थन मिळवण्यासाठी त्यांना आघाडीवर ठेवले जाईल, असे पक्षाच्या वरिष्ठ नेत्यांनी संकेत दिले आहेत. त्यांचा सामाजिक आणि राजकीय अनुभव भाजपाला चंद्रपूर जिल्ह्यातील मतदारांपर्यंत पोहोचण्यास आणि त्यांच्या समर्थनाला बळ देण्यासाठी महत्त्वाची भूमिका बजावणार आहे.
भाजपचा आत्मा हा कार्यकर्ता आहे – सुधीर मुनगंटीवार
यावेळी महिला काँग्रेसच्या माजी अध्यक्ष नम्रता आचार्य यांनी प्रवेश घेतला. या दोघांच्या भाजप प्रवेशाने भाजपची शक्ती या जिल्ह्यात वाढली आहे असे या प्रवेशाच्या वेळी मंत्री सुधीर मुनगंटीवार म्हणाले, या विधानसभा निवडणुकीत भाजपला व महायुतीला यश मिळेल असा विश्वास मुनगंटीवार यांनी व्यक्त केला. जिल्ह्यातील पाच मतदारसंघातील उमेदवार पक्षाने जाहीर केले आहे. आज दुपारपर्यंत चंद्रपूर मतदारसंघातील सहाव्या उमेदवाराचे नाव जाहीर होईल, असेही मुनगंटीवार यांनी सांगितले.
चंद्रपूर जिल्ह्यातील सहा व गडचिरोली जिल्ह्यातील तीन अशा एकूण नऊ जागा भाजप व महायुती जिंकणार आहे. जाहीरनामा व वाचानाम्यात चंद्रपूर जिल्ह्याला झुकते माप राहील असे मुनगंटीवार यांनी सांगितले. भाजप हा परिवार आहे, या परिवारात जोरगेवार व आचार्य यांचे स्वागत आहे असेही मुनगंटीवार यांनी सांगितले.
कार्यकर्ते विधानसभा निवडणुकीत पूर्णशक्तीने काम करतील असे मुनगंटीवार यांनी सांगितले. दिल्ली येथे पक्षाचे प्रामाणिक कार्यकर्ते ब्रिजभुषण पाझारे यांना उमेदवारी मिळावी यासाठी गेलो होतो. जोरगेवार यांना उमेदवारी देऊ नका यासाठी गेलो नव्हतो असेही मुनगंटीवार म्हणाले. राजुरा येथे भाजपचे काही नाराज पदाधिकारी पत्र परिषद घेणार आहे अशी माहिती आहे. मात्र भाजप नेते देवेंद्र फडणवीस यांनी तिथे लक्ष घातले असून ही पत्र परिषद होणार नाही असे मुनगंटीवार यांनी सांगितले.
पक्षाचे प्रामाणिक कार्यकर्ते नाराज झाले आहेत असे सांगण्यात येत असले तरी नाराज व अन्याय झालेल्या कार्यकर्त्यांचे योग्य पुनर्वसन केले जाईल. भाजपचे ज्येष्ठ नेते अमित शहा व राष्ट्रीय अध्यक्ष जे.पी. नड्डा यांनी तसे आश्वासन दिले आहे. भाजपचा आत्मा हा कार्यकर्ता आहे. कार्यकर्त्याला वाऱ्यावर सोडणार नाही. प्रत्येकाला न्याय मिळेल, कुणावर अन्याय होणार नाही, अन्यथा कार्यकर्त्याची अवस्था बंद झालेल्या दोन हजारांच्या नोटसारखी होईल. कार्यकर्ते नाराज होईल मात्र भाजपमध्ये कार्यकर्ता नाराज होईल पक्षाचा विचार सोडणार नाही. त्यामुळे पाझारे बंडखोरी करून निवडणुकीत उभे राहणार नाही असेही मुनगंटीवार म्हणाले. कार्यकर्त्याला हवेवर सोडणार नाही असेही मुनगंटीवार म्हणाले. मला जिल्ह्यातील भाजपच्या सर्व कार्यकर्त्यांची चिंता आहे. त्यांच्यावर अन्याय होणार नाही. २६ नोव्हेंबर रोजी राज्यात महायुतीचे सरकार येईल असाही विश्वास व्यक्त केला. यावेळी महानगर अध्यक्ष राहुल पावडे, ग्रामीण अध्यक्ष हरीश शर्मा, प्रमोद कडू, डॉ. मंगेश गुलवाडे उपस्थित होते.
