विधानसभा निवडणुकीचे निकाल उद्या होणार जाहीर
महाराष्ट्र विधानसभेसाठी पार पडलेल्या निवडणुकांमध्ये १५८ राजकीय पक्ष आणि अपक्ष मिळून ४,१३६ उमेदवार निवडणुकीच्या रिंगणात उतरले होते. उद्या, २३ नोव्हेंबर रोजी सकाळी आठ वाजल्यापासून या निवडणुकीचे निकाल जाहीर होणार आहेत. यंदा मतदानाची टक्केवारी ६५ टक्क्यांच्या पुढे गेली असून ती गेल्या ३० वर्षांतील उच्चांकी टक्केवारी ठरली आहे.
महायुतीस सत्ता स्थापनेची शक्यता
मतदानोत्तर चाचण्यांच्या अंदाजानुसार, महायुतीला बहुमत मिळण्याची शक्यता आहे. मात्र, बहुमतासाठी अपक्ष आणि लहान पक्षांच्या पाठिंब्याची आवश्यकता भासेल, असा अंदाज वर्तवण्यात आला आहे. त्यामुळे सध्या अपक्ष आमदारांशी संपर्क साधण्याचे राजकीय प्रयत्न सुरू आहेत.
प्रकाश आंबेडकरांची भूमिका स्पष्ट
वंचित बहुजन आघाडीचे अध्यक्ष ॲड. प्रकाश आंबेडकर यांनी सरकार स्थापनेबाबत पक्षाची भूमिका जाहीर केली आहे. एक्सवर पोस्ट करत त्यांनी म्हटले की, “जर उद्या महाराष्ट्रात सरकार स्थापन करण्यासाठी वंचित बहुजन आघाडीला कोणत्याही पक्षाला किंवा आघाडीला पाठिंबा देण्यासाठी संख्याबळ मिळाले, तर आम्ही जो कोणी सरकार बनवू शकतो त्याच्यासोबत राहण्याचा निर्णय घेऊ.”
त्याचबरोबर त्यांनी हे देखील स्पष्ट केले की, “आम्ही सत्ता निवडू! आम्ही सत्तेत राहायला निवडू!” यामुळे वंचित बहुजन आघाडीने सत्ता स्थापनेतील महत्त्वाचा घटक होण्याचा निर्णय घेतल्याचे दिसत आहे.
राजकीय खिचडी होण्याची शक्यता
या निवडणुकीत कोणत्याही एका पक्षाला बहुमत मिळण्याची शक्यता कमी असल्याने, निकालानंतर महाराष्ट्राच्या राजकारणात “राजकीय खिचडी” होण्याची शक्यता वर्तवली जात आहे. प्रादेशिक पक्ष या परिस्थितीत निर्णायक भूमिकेत राहतील, असा अंदाज व्यक्त करण्यात आला आहे.
महाराष्ट्राच्या राजकारणातील शक्यतांचे समीकरण
प्रकाश आंबेडकर यांच्या मते, २८८ जागांपैकी १०० जागा राष्ट्रवादीचे शरद पवार गट, अजित पवार गट, आणि शिवसेना शिंदे गटाकडे जाण्याची शक्यता आहे. उर्वरित १८८ जागांवर भाजप, काँग्रेस, शिवसेना उद्धव ठाकरे गट आणि इतर पक्षांचा समावेश असेल.
सरकार स्थापनेसाठी कोणत्याही एका पक्षाला बहुमत मिळणार नसल्याने प्रादेशिक पक्षांवर अवलंबून राहावे लागेल. भाजप आणि काँग्रेसला बाजूला ठेवत इतर पक्षांनी एकत्र येऊन सत्तास्थापन करण्याचा प्रयोग होऊ शकतो. या प्रक्रियेत खासदार सुप्रिया सुळे महत्त्वाची भूमिका बजावू शकतात, असे प्रकाश आंबेडकर यांनी भाकीत केले आहे.
वंचित बहुजन आघाडीची निर्णय क्षमता
या निवडणुकीत वंचित बहुजन आघाडी निर्णायक भूमिका बजावण्याच्या तयारीत असून, त्यांचा पाठिंबा कोणत्या आघाडीला मिळणार, याकडे राज्यातील राजकीय वर्तुळाचे लक्ष लागले आहे.
