चंद्रपूर जिल्हा महिला काँग्रेस अध्यक्षपदाचा राजीनामा
चंद्रपूर जिल्हा महिला काँग्रेस कमिटीच्या अध्यक्षा नम्रता आचार्य ठेमस्कर यांनी मंगळवारी पत्रपरिषदेत काँग्रेसच्या वरिष्ठ नेत्यांवर गंभीर आरोप करत पदाचा राजीनामा दिला आहे. त्यांनी सांगितले की आत्मसन्मान दुखावल्यामुळे त्यांनी ही भूमिका घेतली आहे. त्यांनी काँग्रेस पक्षातील वरिष्ठ नेत्यांवर घराणेशाहीला चालना देण्याचा आरोप केला आहे.
घराणेशाहीच्या आरोपांमुळे पक्षांतर्गत कलह
नम्रता आचार्य ठेमस्कर यांनी पत्रपरिषदेत सांगितले की काँग्रेस पक्षातील वरिष्ठ नेते आपल्याच कुटुंबातील सदस्यांना निवडणुकीत संधी देण्यासाठी इतर अल्पसंख्यांक आणि समर्पित कार्यकर्त्यांकडे दुर्लक्ष करत आहेत. त्यांनी दावा केला की, चंद्रपूर जिल्ह्यात पक्षाच्या सर्वधर्म समभावाच्या विचारांना धक्का पोहोचवला जात आहे आणि जातीयवादी विधाने करून पक्षातील कार्यकर्त्यांचे मनोबल खचवले जात आहे.
पक्षाच्या कार्यक्रमांमध्ये सक्रीय सहभाग
नम्रता आचार्य ठेमस्कर यांनी पक्षाच्या अनेक उपक्रमांमध्ये सक्रिय सहभाग घेतल्याचे सांगितले. त्यांनी ३० आंदोलने केली, ६० पेक्षा जास्त व्हिडिओ सोशल मीडियावर भाजप व मोदी सरकारविरोधात तयार केले. कोविड काळात “मदतीचा एक घास,” पूरग्रस्तांना मदत, स्वाक्षरी अभियान आणि राखी महोत्सव यासारखे उपक्रम आयोजित केले. त्यांनी प्रदेश महिला काँग्रेसकडून देण्यात आलेली जबाबदारी वेळोवेळी यशस्वीपणे पार पाडली.
वरिष्ठ नेत्यांकडून दुर्लक्ष आणि धमकीचा आरोप
ठेमस्कर यांनी सांगितले की, विधानसभा निवडणुकांसाठी इच्छुक उमेदवारांच्या अर्जांची यादी मागवण्यात आली होती. त्यांनी देखील अर्ज दाखल केला होता, परंतु त्यांना वरिष्ठ नेत्यांकडून अर्ज दाखल केल्याबद्दल टीका करण्यात आली आणि अप्रत्यक्षपणे पदावरून काढून टाकण्याची धमकी दिली गेली. ठेमस्कर यांनी पक्षातील वरिष्ठ नेत्यांच्या मानसिकतेमुळे कार्यकर्त्यांचे मनोबल खचत असल्याचा आरोप केला.
काँग्रेस पक्षातील अन्यायावर रोष
राजीनामा देताना नम्रता आचार्य ठेमस्कर यांनी काँग्रेस पक्षातील खासदारांवर थेट हल्ला चढवत पक्षात केवळ त्यांच्या कुटुंबातील आणि निवडक समाजातील लोकांनाच प्रोत्साहन दिले जात असल्याचा आरोप केला. महिला आणि अल्पसंख्याक समाजाच्या कार्यकर्त्यांवर अन्याय होत असल्याचे त्यांनी सांगितले. त्यांच्या राजीनाम्याची माहिती प्रदेश अध्यक्ष नाना पटोले, प्रदेश महिला काँग्रेस अध्यक्षा संध्या सव्वालाखे, तसेच अखिल भारतीय काँग्रेस कमिटीचे महासचिव रमेश चेन्नीथला यांना दिली असल्याचे ठेमस्कर यांनी स्पष्ट केले.
