गरिबीच्या जोखडातही जिद्दीने उंच भरारी
नागपूर: झोपडपट्टीत राहणाऱ्या पल्लवी चिंचखेडे हिने अत्यंत कठीण परिस्थितीतून मार्ग काढत भारतीय प्रशासकीय सेवेत (IAS) प्रवेश केला आहे. तिच्या यशाची कहाणी ही संघर्ष, जिद्द आणि कठोर मेहनतीचा प्रतीक आहे. पल्लवीच्या वडिलांचे रंगकाम आणि आईचे शिलाई काम हेच कुटुंबाचा आधार होते. मात्र, आर्थिक स्थिती कमकुवत असूनही पल्लवीने आपल्या स्वप्नांना आकार दिला.
प्रेरणेचा पहिला अंकुर
अमरावती कॅम्पमधील बिच्छू टेकडी, चपराशी पुरा या झोपडपट्टीत राहणाऱ्या पल्लवी देवीदास चिंचखेडे सातवीत असताना वडिलांसोबत “मिशन आयएएस अमरावती” या संस्थेच्या कार्यक्रमात सहभागी झाली होती. तिथे उपस्थित सनदी अधिकारी तुकाराम मुंढे यांचं भाषण ऐकून तिला आयएएस होण्याची प्रेरणा मिळाली. याच कार्यक्रमाने तिच्या आयुष्याला नवं वळण दिलं.
कठीण परिस्थितीशी सामना
पल्लवी ज्या भागात राहत होती, तिथे रस्ते नव्हते, घरात अभ्यासासाठी पुरेशी जागा नव्हती, आणि सतत होणारा गोंगाट अभ्यासाला अडथळा ठरत होता. वडाळी तलावाजवळ असलेल्या महामार्गावरून ट्रकांची सतत ये-जा होत असे. या सगळ्या अडचणींवर मात करत पल्लवीने सातवीपासूनच स्पर्धा परीक्षेची तयारी सुरू केली.
शिक्षण आणि मार्गदर्शन
पल्लवीने अमरावतीच्या शासकीय अभियांत्रिकी महाविद्यालयातून अभियांत्रिकी पदवी मिळवली. त्यानंतर एका खाजगी कंपनीत तीन वर्ष नोकरी केली. मात्र, नोकरीत समाधान न मिळाल्याने तिने राजीनामा दिला आणि समाज कल्याण विभागाच्या बार्टी संस्थेच्या मदतीने UPSC परीक्षेची तयारी सुरू केली. डॉ. पंजाबराव देशमुख आयएएस अकादमीतील प्रा. डॉ. नरेशचंद्र काठोळे यांच्या मार्गदर्शनाने तिच्या तयारीला नवा दिशा मिळाला.
यशाचे श्रेय कुटुंबाला
पल्लवीने आपल्या यशाचे श्रेय आपल्या वडिलांना दिले. त्यांनी दिलेल्या प्रेरणा, पाठिंबा आणि कष्टामुळेच ती आयएएस बनू शकली. झोपडपट्टीतून आयएएस होण्याचा प्रवास हा नक्कीच अनेकांसाठी प्रेरणादायी आहे.
पल्लवीची यशस्वी झेप – सामान्यांमध्ये असामान्यत्वाचा दीप
पल्लवीची कहाणी दाखवते की परिस्थिती कितीही प्रतिकूल असली, तरीही जिद्द, मेहनत आणि योग्य मार्गदर्शनाने कोणतेही स्वप्न साकार करता येते.
