गडचिरोलीला नव्या सरकारकडून ‘खेडूत’ ट्रीटमेंट!, नेत्यांची वादग्रस्त केमिस्ट्री गडचिरोलीसाठी विनाशकारी ठरते का?”
गडचिरोली, नेहमीच्याच निराशेची ‘राजकीय राजधानी’!
गडचिरोलीचं राजकारण परत एकदा ‘खेड्यातला कुस्तीचा आखाडा’ बनलाय! राष्ट्रवादी काँग्रेस अजित पवार गटाचे आदिवासी नेते धर्मरावबाबा आत्राम यांना नव्या मंत्रिमंडळातून बाहेर फेकल्याने समर्थकांच्या भावना चिरडल्या गेल्या आहेत. ऐतिहासिक ‘राजघराण्या’चा वारसा असूनही, धर्मरावबाबा यांना वाट्याला फक्त राजकीय वादाचे टोमणे आलेत.
‘पटेल-आत्राम’ वादाचा गोळीबार:
प्रफुल पटेल आणि धर्मरावबाबांच्या वादाच्या कहाण्या गडचिरोलीतील आदिवासी कट्ट्यांवरून चहा प्यायच्या टेबलापर्यंत पोहोचल्या आहेत. “तुम्ही पटेल समर्थकांचा दबाव सहन करू शकत नसाल तर राजीनामा देऊनच टाका,” असा सल्ला धर्मरावबाबांना त्यांच्या राजकीय गुरूंनी दिला, अशी चर्चाही जोरात आहे. “वाद मिटवायचा नाही, तर भडकवायचा!” हे धोरण दोन्ही नेत्यांनी अंमलात आणल्याचं दिसतं.
“वचन दिलं, पण झगमगत्या यादीत नाव नाही!”
अजित पवार यांनी प्रचारात धर्मरावबाबा यांना “पुन्हा मंत्री करू” असं सांगितलं होतं. पण, मंत्रीपदाची नवी यादी आली आणि धर्मरावबाबांचं नाव चक्क गायब! समर्थकांनी यावर भन्नाट प्रतिक्रिया दिलीय: “पवारांच्या वचनांची वैद्यकीय चाचणी घेतली पाहिजे, ‘खोटं वचन’ ठरलंय!”
गडचिरोलीचे पालकमंत्री: फडणवीस की इंपोर्टेड स्पेशालिस्ट?
गडचिरोलीचे पालकमंत्री पद म्हणजे सध्या ‘पॉवरफुल पोझिशन’ आहे. पण धर्मरावबाबा बाहेर गेलेले पाहता, फडणवीसांनी हे पद स्वतःकडे ठेवण्याची जोरदार चर्चा आहे. जिल्ह्यातील आदिवासी म्हणतायत, “पालकमंत्री परदेशातून का आणायचा? घरच्या घरात एवढा वाद तरी आहे!”
धर्मरावबाबांची ‘सोशिक’ प्रतिक्रिया:
“मला काही फरक पडत नाही, पक्षाच्या आदेशाचे पालन करतो,” असं ते म्हणालेत. पण त्यांच्या चेहऱ्यावरचं दु:ख लपवायला सोन्याची जाळी लागेल, अशी कार्यकर्त्यांची कुजबुज आहे.
